ՄԵՐ ԴՊՐՈՑԻ ՊԱՏՄՈՒԹՅՈՒՆԸ

Սյունիքի  գողտրիկ վայրերից մեկում` ծովի մակերևույթից 1700մ բարձրության վրա է գտնվում Ձագիկավանը: Իր մերկ բլուրներով, Կապուտջիղից եկող սառը քամիներով և ցրտաշունչ ձմեռներով Ձագիկավանը դժվար թե գրավի շատերին: Սակայն գյուղը, իսկապես, հրաշք է: Նրան երկու  կողմից    իրենց գիրկն են առել Ողջի գետն ու  Բաղաց ջուրը , որոնց ջրերը գյուղը դարձրել են փոքրիկ մի դրախտավայր:

Ահա հենց այստեղ` երկու գետերի միախառնման հարևանությամբ է  գտնվում դպրոցը:

Դպրոցը    վերաբացվել է 1989թ. սեպտեմբերի 1- ին: Դպրոցի տնօրենի  պարտականությունը դրվեց բնատուր տաղանդի տեր, մասնագիտությամբ  կենսաքիմիկ Լեռնիկ Շավարշի Ազարյանի վրա:

Տնօրեն Լ. Ազարյանը նախ ձեռնամուխ եղավ ավերված դպրոցի վերականգնմանը  /1990թ Կապանի  շրջխորհրդի  գործկոմի, Քաջարանշին տրեստի օժանդակությամբ/, ապա մանկավարժական կարող ուժերի համալրմանը: Դպրոցն իր հյուրընկալ դռները բացեց բռնագաղթված մի բուռ հայերի և նրանց երեխաների առջև:  Առաջին իսկ օրվանից մայրենի լեզուն, գիրը դժվարությամբ յուրացնել սկսեցին ոչ միայն երեխաները, այլև նրանց ծնողները, բռնագաղթվածները: Կրթօջախը, որը լքված տուն էր հիշեցնում, օր օրի կայանում էր` շնորհիվ տնօրեն Լեռնիկ Ազարյանի և երիտասարդ կոլեկտիվի նվիրական ջանքերի: Պատերն անգամ ասես կարոտել էին հայեցի բառ ու բանին, երգին, պարին:

Մեկ տարվա ընթացքում դպրոցը դարձավ դպրոց-մանկապարտեզ, իսկ հաջորդ տարի՝միջնակարգ   դպրոց-մանկապարտեզ:

Դպրոցի առաջին ուսուցիչներն էին Մարտուն Փարսյանը, Մարատ Վարդանյանը, Անահիտ Գևորգյանը, Կարեն Հարությունյանը ….

Դպրոցում  կազմակերպվել  և  կազմակերպվում են  մի շարք միջոցառումներ՝ սպորտային և  ռազմահայրենասիրական,  իրականացվում է ուսումնադաստիարակչական գործընթացի արդյունավետությանը նպաստող բազմաթիվ ծրագրեր: Ամեն  տարի կազմակերպվում  է աշնանային և տարեվերջյան  էքսկուրսիաներ,  շրջայցեր : Դպրոցի աշակերտները եղել են Հայաստանի և Լեռնային Ղարաբաղի համարյա  բոլոր պատմական գեղատեսիլ վայրերում:

Մեր դպրոցի աշակերտները ակտիվորեն մասնակցում են մարզային և հանրապետական միջոցառումների և հաճախ վերադառնում  հաղթանակներով, գովասանագրերով: Երկու տարի մասնակցեցին Հայաստանի պատանեկան նվաճումների կողմից կազմակերպված “Ձեռնարկատիրական և քաղաքացիական կրթություն ավագ դպրոցի աշակերտների համար” ծրագրին:

Դպրոցի 1-12-րդ դասարանների  աշակերտներն  ամեն օր, երկար դասամիջոցին սնվում են տաք ճաշով. դպրոցն ընդգրկված է “Տաք սնունդ” ծրագրի մեջ, իսկ կրտսեր դասարանի երեխաները  նաև ստանում են հյութ և թխվածքաբլիթներ:

Գաղտնիք չէ, որ այսօր դպրոցը առաջադիմում, հարատևում և կանգուն է հովանավորներով: Հովանավորի, բարեգործի առավել կարիք ունեն գյուղական դպրոցները, որոնք վտանգված են դատարկվելու: Գյուղական դպրոցի կայուն գործունեությունը նաև գյուղի գոյության պայմանն է: Ահա թե ինչու Զանգեզուրի պղնձամոլիբդենային կոմբինատը 2005թ-ից  ի վեր կանգած է մեր թիկունքին: Դա սոսկ հովանավորություն չէ. դա գյուղը կանգուն պահելու, կրթության նկատմամբ մեծ  հարգանք ունենալու անհանգստությունից է ծնվել:

Այսօր, սկսած 2005թ-ից, աշակերտներին և ուսուցիչներին դեպի դպրոց փոխադրում են ավտոբուսներ, որի հովանավորը կրկին «ԶՊՄԿ» ՓԲԸ-ն է:

2013թ-ին  ԶՊՄԿ –ի, <<Քաջարան>> հիմնադրամի կողմից հիմնանորոգվեց դպրոցը՝ տանիք, հատակ, պատուհաններ, ջրատար, կոյուղի, մարզադահլիճ, կատարվեց դպրոցի ներքին և արտաքին  հարդարում,  մարզահրապարակի հիմնում, մանկական խաղահրապարակի ստեղծում, ասֆալտապատում:

Այս տարի լրանում է մեր  դպրոցի 30 ամյակը: 30 հաջողություններով լի երկար ու ձիգ տարիներ, հագեցած բուռն աշխատանքով, նվիրումով, մատաղ սերնդի դաստիարակման հայրենանվեր գործունեությամբ: Ունեցել ենք բազմաթիվ շրջանավարտներ`տարբեր բնագավառների  նվիրյալներ, շրջանավարտներ, որոնք այսօր էլ հայոց սահմաններն են պաշտպանում   և երկիր հայրենին:

Կրթօջախի   տնօրենությունը   և մանկավարժները   ամեն  ինչ  անում   են և մեծ կյանք են ճանապարհում  գիտակից,  բանիմաց, ազգասեր, դաստիարակված   երիտասարդների   և աղջիկների,  որոնք   կհզորացնեն   մեր  հայրենիքը   և կդառնան  իրենց   հայրերի  արժանի հետևորդները: